Кăрлач уйăхěн 27-мěшěнче район администрацийěн пухусем ирттермелли залěнче хурт- хăмăрçăсен черетлě семинар-канашлăвě иртрě. Ку ěçе ОАО «Агентство по пчеловодству» организацин тěп директорě, ял хуçалăх наукин кандидачě Г.А.Максимов, ял хуçалăх наукин докторě И.Н.Мадебейкин профессор, Вăрнарти ял хуçалăх техникумěн вěрентекенě Н.И.Васильев, район администрацин тěп эксперт –специалисчě Г.П.Романов хутшăнчěç.

      Пухăва район администрацийěн пуçлăхěн пěрремěш заместителě- ял хуçалăхěпе экологи пайěн пуçлăхě В.Горбунов уçрě. Вăл хурт- хăмăр ěрчетес ěç çав тери кăткăс та сумлă пулнине палăртрě, иртнě çулхи çак ěçри çитěнÿсемпе паллаштарчě. Канашлăва килнě ăсчахсем паянхи хурт- хăмăр усракансен умěнче çут çанталăкри пысăк улшăнусене пула мěнле йывăрлăхсем тухса тăни çинчен, çавăн пекех çак йывăрлăхсене çěнтерме мěнле ěçсем туса пымалли пирки сěнÿсем пачěç.Çак пухура тěрлěрен ыйтусем пăхса тухрěç. Хурт- хăмăрçăсем нумай çěннине илчěç. Пуху усăллă иртрě.

       Ěç вěçленес умěн Вăрнарти ял хуçалăх техникум директорě Ольга Львова ячěпе Васильев Н.И. вěрентекен вěсемпе тачă çыхăнса ěçлекен ОАО «Агентство по пчеловодству» организацин тěп директорне Г. Максимова, уйрăм утарçă- фермер И.Федорова тата «Санары» агрофирма утарçине В.Ильина тав çырăвěсемпе чысларě.

      Юлашкинчен ятарлă комисси пухăва хутшăннă утарçăсен сиплě пылěсене хак пама пултарчěç. Районти чи тутлă та паха пыл ятне Вăрнарти ял хуçалăх техникумě тивěçлě пулчě, утарçи- Николай Иванович Васильев. Иккěмěш вырăнта - Иван Михайлович Федоровпа (фермер- утарçă), Василий Сергеевич Ильин («Санары» агрофирма утарçи). Виççěмěш вырăнсене Вячеслав Николаевич Васильев (Кайри Тукай), Иван Михайлович Михайлов (Кайри Тукай), Виталий Николаевич Николаев (Вăрнар поселокě) йышăнчěç. Çěнтерÿçěсене дипломсемпе чысларěç.